நிராகரிப்பு
நிராகரிக்கப்பட்ட வணக்கமொன்று
அழுதுவிட்டு அமைதியாகிறது
அமைதியாயிருந்துவிட்டு
மறுபடி அழத்தொடங்குகிறது
நிராகரிக்கப்பட்ட வணக்கமொன்று
வசை வார்த்தைகளைக் கொண்டு
சபிக்கிறது
நிராகரிக்கப்பட்ட வணக்கமொன்று
வன்மத்தின் விதையொன்றை
நட்டு வளர்க்க ஆரம்பிக்கின்றது
நிராகரிக்கப்பட்ட வணக்கமொன்று
திமிரின் இலக்கணங்களைக்
கற்றுக்கொள்ளத் துவங்குகிறது
நிராகரிக்கப்பட்ட வணக்கமொன்று
அலட்சியத்தின் ருசியையும்
ஆணவத்தின் ருசியையும்
கைகளுக்குச் சொல்லிக்கொடுக்க
ஆரம்பிக்கிறது
நீங்கள் நிராகரித்துவிட்ட வணக்கமொன்று
உங்களை நிராகரிப்பதற்காக
சரியான சந்தர்ப்பமொன்றைத் தேடியபடியே
உங்கள் பின்னால் வந்துகொண்டிருக்கிறது
-சௌவி
கருத்துகள் இல்லை:
கருத்துரையிடுக