தினமும்..

 எத்தனை எத்தனை ரயில்கள்

ஓடிக் கொண்டிருக்கின்றன

ஆனால் ஒவ்வொரு ரயிலையும்

யாரோ ஒருவர் 

அவசர அவசரமாக வந்தும்

தவறவிடுகிறார் 

பேருந்து நிறுத்தத்தில்

யாரேனும் ஒருவர் 

தினமும் பேருந்தைத் தவறவிட்டுவிட்டு

அடுத்த பேருந்துக்காகக் காத்திருக்கின்றார்

எப்படியேனும் ஒரு ஆட்டோ 

பக்கத்திலிருக்கும் இடத்தை 

சுற்றிச்சுற்றிச் சென்று

தூரமென ஏமாற்றி

அதிகம் வசூலித்துவிடுகிறது

அத்தனை கடுமையான சட்டங்களிருந்தும்

எங்கோ ஓரிடத்தில்

கள்ளச்சாராயம் 

காய்ச்சப்பட்டுக்கொண்டேயிருக்கிறது

எது நடந்தாலும் 

எதுவும் நடக்கவில்லையென்றாலும்

பூமி மட்டும் எப்போதும்போல 

இடமிருந்து வலமாகச் 

சுற்றிக்கொண்டேயிருக்கிறது 

-சௌவி